فاس نيوز – موقع الجهة الاخباري 24 ساعة موقع اخباري لجهة فاس مكناس منكم و اليكم ننقل الرأي و الرأي الآخر
علاش التعويضات ديال la mutuelle هزيلة و شكون السبب !؟
دفعت ملف فيه 2000 درهم وتعوضت غير 600 درهم!!!
دفعت ملف فيه 400 درهم وتعوضت غير 180 درهم!!!
كل هذه أسئلة تاتكرر من الناس اليوم غادي نعرفو السبب علاش التعويضات هزيلة وشكون الأطراف المسؤولة
أولا خاصنا نفهمو واحد القضية كنوبس تاتعوضك على التعريفة الوطنية المرجعية (TNR) لي دايراها وزارة الصحة (بعض الأمثلة في الجدول أسفله)
وزارة الصحة محددة كل علاج أو تحاليل أو سكانير أو عملية هي لي محددة الأثمنة ديالهم في الصعيد الوطني
مثلا إيكوغرافي التعريفة الوطنية ديالو هي 200 درهم وكنوبس تاتعوضك 80% من هاد المبلغ لي هو 160درهم + التعويض ديال التعاضدية بوحدو
مثلا مشيتي درتي إيكوغرافي ب 400 درهم ودفعتي الملف ديالك للتعاضدية غادي يعوضوك ب %80 ولكن ماشي من 400درهم وإنما من 200درهم
لذلك تانلقاو بزاف الناس تايتشكاو من التعويضات الهزيلة لي تايتوصلو بيها
شكون الأطراف المباشرة لي مسؤولة عن هاد المشكل؟؟
أولا: كنوبس بحكم هي المؤسسة المنظمة للتأمين الصحي بالقطاع العمومي
ثانيا: ANAM(الوكالة الوطنية للتأمين الصحي) لي هي لي متحكمة في التأمين الإجباري في المغرب أي متحكمة في كنوبس و CNSS
ثالثا: وزارة الصحة بحكم هي الوزارة المعنية بهاد المشكل
ورابعا وأخيرا: المصحات والأطباء والمختبرات لي هوما لي تايقدمو العلاجات للمواطنين
لازم جميع هاد الأطراف تجتمع باش تلقا حل باش يتم مراجعة هاد التعريفة الوطنية المرجعية
كنوبس تاتلوح الكرة لوزارة الصحة و ANAM و تاتقول ليك هوما لي دايرين هاد التعريفة و هوما لي مكلفين و مسؤولين عليها
والمصحات والأطباء والمختبرات تايقولو هاد التعريفة كانت من شحال هادي ودابا راه كاينين أجهزة متطورة ومكلفة وهاد التعريفة الوطنية المرجعية مابقات كافية.
عن موقع : فاس نيوز ميديا