فاس نيوز – موقع الجهة الاخباري 24 ساعة موقع اخباري لجهة فاس مكناس منكم و اليكم ننقل الرأي و الرأي الآخر
روت “م.د” ابنة إحدى ضحايا فاجعة إيموزار التي أودت بحياة 3 نساء، بعد أن سقطت الدراجة النارية الثلاثية العجلات التي كانت تقلهم، من على منحدر صخري عميق على مقربة من مكان انعقاد سوق اثنين آيت سباع لجروف ضواحي بلدية إيموزار كندر، تفاصيل الحادثة المؤلمة وكيف تلقت الخبر في طريق عودتها من السفر من مولاي يعقوب نحو إيموزار.
وروت الفتاة كيف بدأ يوم الإثنين المشؤوم الذي شاءت الأقدار أن يكون آخر يوم ترى فيه والدتها: “كان عندي شي سفر لمولاي يعقوب نجيب شي وراق لواحد اليتيم في سبيل الله، لقيت الميمة الحنينة فايقة دايرة لفطور فيقت خويا الصغير يفطر وقالت لي آجي تفطري قلت لها راني ماقاداش حتى يطلع النهار ونفطر ملي نوصل لفاس وقالت لي إيوا الله يهنيك وردي بالك مع الطريق قلتلها واخا أمي الله يهنيك هاني مشيت”.
وقالت: “وصلت لبلدية مولاي يعقوب، صايبت الوراق ورجعت للمحطة، ركبت الكار تسنيت حتا عمر وانطلق وصلنا تقريبا نص الطريق، تكون الساعة 11، اتصل بيا الوالد قال لي م. فينك؟ دوزي على السبيطار شوفي شنو واقع تما قلت ليه أنا راني بعيدة وقطع، زدنا شويا عاود عيط ليا فينك دبا؟ قلت ليه قربت نوصل لفاس وهو يقول لي المشكل، الوالدة الحنينة ديالي مشات للسوق الأسبوعي، داز واحد مول التريبورطور هاز معاه جوج عيالات جيراننا وقالوا لها يالله نمشيوا ركبي سربي وركبت معاهم”.
وشرحت “م.” كيف وقعت الحادثة قائلة: “وصل لواحد البلاصة تقطع الفران ديال التريبورطور وعواج بيه لواحد الحافة عالية، الشيفور نقز وهرب وخلا التريبورطور زلق بهم في الحافة، كانت فيه الوالدة الله يرحمها وواحد السيدة وبنتها وولدها الصغير عندو عامين، العيالات كلهم ماتوا إلا داك الولد الصغير اللي نجا راه مازال لحد الآن في المستشفى، الأم ديالو هي اللي نقداتو زيرات عليه باش ميفلتش من يديها”.
ووصفا لحالتها لحظات بعد تلقيها خبر وفاة والدتها تقول “م.”: “ملي قربت نوصل حدا المحطة ديال فاس، تلقيت للكار اللي غادي لإيموزار طلعت فيه، غير هو تحرك بشي 5 دقائق، رجع الوالد عيط ليا قالي راه ماما ماتت الله يرحمها، داقت بيا الدنيا كحالت بيا، أمي خليتها خير وسلام، كيفاش وقع هادشي، بكيت الطريق كاملة وأنا كنغوت ونبكي وطوالت الطريق، مول الكار مسكين كيجري بسرعة باش يوصلني والناس تيصبروني ما قديتش على فراق الحنينة، وصلت لقيتهم تعرضوا لي فالمحطة ديال إيموزار وداوني لعندها وتم عرفت باللي بصح أمي الحنينة مشات”.
بدموع منهمرة تقول “م.”: “خلاتلي 3 ديال الإخوة دراري صغار، راه مسؤولية كبيرة، وجوح بنات مزوجين… الله يرحمك الحنينة أمي الله يرحمك”.
وأوضحت ابنة الضحية أن إحدى الصور المتداولة للحادثة، يظهر فيها كيس التسوق الخاص بوالدتها وحذاؤها، كما طلبت من المغاربة الدعاء لها قائلة: “دعيو معايا بالصبر راه فراق الوالدة صعيب، فين ما درت كنلقى شي حاجة تفكرني بيها، راه لحد الآن الخبز اللي وجدات نهار الإثنين للغداء مخبعاه عندي، واليوم 4 أيام وغدا العيد الله يا ربي، الله يفرج عليا ويعاوني باش نربي إخوتي”.
وكانت مصالح الدرك الملكي لإيموزار كندر قد فتحت تحقيقا للكشف عن ملابسات وقوع هذا الحادث الذي أودى بحياة 3 نساء وأوقفت، على إثره، صاحب الدراجة ثلاثية العجلات وأخضعته لتدابير الحراسة النظرية.
عن موقع : فاس نيوز ميديا
