مستخدمة بوكالة للقروض الصغرى تدق ناقوس الخطر.. كيرغموا علينا نخرجو ونبززوا على الناس يخلصوا

من مراسلاتكم بدون تصرف:

(السلام عليكم ورحمة الله وبركاته
الله يرحم والديك بغيت هادشي يعرفوه الناس.
انا كنخدم فمؤسسة للقروض الصغرى. العالم كله ف أزمة وهاد الناس لي خدامين معاهم كتجينا تعليمات بلي نمشيو نعيطوا و ندقوا على الزبناء يجيو يخلصو الشهر لي عليهم . و يمشي العمل عادي بحال الايام العادية. و الناس كلها كتعرف بلي هاد المؤسسات طبيعة الزبناء ديالها هم الناس البسطاء فالدخل ديالهم . يعني غير الصنايعية و التجار البسطاء و تجار المتجولون. يعني كيقولوا لينا غير يجيو يخلصو واخة نوضوها سباط معاهم.
و لي مابغاش يتفهم لي أن الناس ديال siége كلهم خافوا على راسهم و شدوا عليهم بيبانهم. وداروا قرار نص الكبير من العملاء لي ف الوكلات يمشيو كونجي مدته شهر و اسبوع. وخلاو 3 دناس خدامين. المهم هاد الناس اختارهم غير هكاك مع العلم انا شخصيا عندي طفل فعمره قريب سنة و عائلة ديالي بعاد عليا و مايمكنش للأم ديالي تجي فهاد الظروف الصعبة بحكم امرأة كبيرة فالسن. و الزوج ديالي خدام  و مايمكنش يجي ف الظروف الراهنة. يعني حنا ماخافوش علينا و دارونا كبش فداء. بسيف عليك تخدم .
أنا ماعرفتش هاد الناس فين بغاو يوصلوا بالطمع والجشع ديالهم. واه كاين أزمة على العالم ولكن ماشي غير على هادوا. أنا كنتمنى يخرج قرار فحق هاد الناس يحبسو الخلاص للزبناء حيت البعض منهم هدرنا معه بقا يبكي وقالوا حنا حبسنا على الخدمة .
عافكم بغيت هادشي يقراوه الناس وتوصل لبعض من يتخد القرار في هاد البلد. ويتخد إجراء كما دارو مع الابناك.
والله يحد على،الجميع الباس)

عن موقع : فاس نيوز ميديا