جيم وبارطاج..قنبلة موقوتة فأي لحظة تفرگع فيك وتدمر ليك حياتك وتشتت شمل عائلتك .

الشائعات والأخبار الزائفة معروفة و كاينة منذ القدم وهي وسيلة شائعة يتم استعمالها لتحقيق مصالح خاصة او خدمة اجندات معينة اللي الهدف ديالها دائما كايكون خبيث ومافيه تا منفعة عامة وانما التشويه او الابتزاز والاتجار في الحياة الخاصة للمواطنين.
ولكن شنو اللي كايخلي هاد الشائعات تنتاشر وتلبس ثوب الحقيقة ويوليو الناس يتيقوها ويغفلو علا اكتشاف الحقيقة المخفية؟؟؟؟
الجواب بسيط بزااف هو دعم الشائعة والمساهمة في نشرها دون التحقق من صحة معطياتها ومعرفة اهدافها الحقيقية نعطيو مثال بهاد المنشور مثلا ديال هاد الصفحة المعروفة بنشر الاخبار الزائفة والترويج لمعطيات كاذبة (نبينو المنشور) هاد المنشور اللي ماعندو تا شي اساس من الصحة والمعطيات اللي فيه غير صحيحة تماما ولكن بقصد او عن جهل كاينة هاد الفئة اللي دعمات هاد المنشور بليجيم والكمونتيرات وهي ماعارفاش الحقيقة وماكلفاتش راسها تبحث فمدى صحة مضامنين المنشور.
هاد الناس اللي كيتعتابرو امام القانون مجرمين الكترونيين وغادي تم المعاقبة ديالهوم بالحبس والغرامة لانهم مساهمين فنشر الاشاعة والاخبار الكاذبة والتشهير بالاشخاص ومعطياتهوم الشخصية وهادشي عندو ابعاد خطيرة عليهوم حيت كليك بسيط ممكن يكون ثمنو غالي بزااف وغايجر بيهوم لما لا يحمد عقباه. 

يعتبر توزيع منشور أو نص أو صورة أو أي محتوى رقمي عبر واتساب أو غيره من وسائل الاتصال بالشبكة العمومية الرقمية جريمة مكتملة الأركان، خصوصا عندما نعيد نشر محتوى لصفحة مجهولة و لمعطيات نجهل صحتها و نجهل المشرف عنها و يتضمن المحتوى إساءة واضحة بدون أدلة، مما يشكل القصد الجنائي شروط صحته بقوة :
الفصل 2 – 447 ف”يعاقب بالحبس من سنة واحدة إلى ثلاث سنوات وغرامة من 2.000 إلى 20.000 درهم، كل من قام بأي وسيلة بما في ذلك الأنظمة المعلوماتية، ببث أو توزيع تركيبة مكونة من أقوال شخص أو صورته، دون موافقته، أو قام ببث أو توزيع ادعاءات أو وقائع كاذبة، بقصد المس بالحياة للأشخاص أو التشهير بهم.”
تخيل اخي المواطن جالس فدارك كاتبارطاجي فالمعطياات الكاذبة او الاخبار الزائفة التي تسبب الضرر للاشخاص حتى كاتلقا راسك متابع قضائيا وكاتسناك عقوبات صارمة بينما اللي طلق الاشاعة حقق منها ربح مادي وسترزق مع راسو و راه كايقلب علا كذبة اخرى يطلقها وانت طالع هابط فالمحاكم.
الاخبار الزائفة كاتسبب ضرر للناس المستهدفين والناس اللي كايتيقوها ويدعموها ويبارطاجيوها وحتى للي كايطلقها وممكن تسبب فجرائم اخرى حيت عندها ابعاد خطيرة والقانون واضح فهاد الاطار وكايعاقب عقوبات صارمة ولا يحمي المغفلون فرجاء ماتنساقوش وراء الأخبار الكاذبة ماتبارطاجيوهااش وماتدعموهاش وماتكونوش مصدر استرزاق للصفحات المأجورة اللي كاتخدم اجنداا انفصالية خبيثة تهدف الى زعزعة الامن والامان فالبلاد وتحقيق الربح علا ظهر الناس السذج
اخي اختي حلل وناقش وخدم عقلك وماتكونش مجرم /ضحية فنفس الوقت وتضر راسك والاشخاص وبلادك بالاشاعات والأخبار الزائفة.

يتبع…….

المصدر : فاس نيوز ميديا