أكبر سرقة رقمية فالتاريخ تهز عالم العملات المشفرة وتحذيرات الباحث أحمد النميطة حول حماية المغاربة فهاد المجال

واحد الواقعة اللي ما عمرها كانت فالتاريخ ديال العملات الرقمية ضربات منصة التداول Bybit اللي كاينة فدبي، بحيث تعرضات لاختراق إلكتروني خطير وخسرت فيه أكثر من مليار ونص دولار من عملة إيثيريوم. هاد السرقة رجعات النقاش بقوة على الأمان ديال منصات التداول الرقمية والمخاطر اللي كتعرض ليها المستثمرين، خصوصًا فدول اللي ما عندهاش قوانين واضحة تحميهم.

حسب التقارير الأولية، القراصنة استغلو ثغرات أمنية فالنظام ديال المنصة وقدرو يحولو الفلوس لعناوين مجهولة، الشي اللي خلا عملة إيثيريوم تطيح بـ4% وتوصل لـ2641 دولار للوحدة. ورغم أن مؤسس المنصة قال باللي غادي يعوضو المتضررين، إلا أن هادشي كشف من جديد هشاشة الأمن السيبراني فهاد النوع ديال الاستثمارات.

فالمغرب، عدد كبير ديال الشباب ولاو كيبغيو يستثمرو فالكريبتو، ولكن الواقع كيبين أن المخاطر كثر من الفوائد، خصوصًا مع غياب قوانين تحمي فلوس الناس فحالة تعرضو لاختراق بحال هادا.

الباحث أحمد النميطة، اللي متخصص فـحماية حقوق الإنسان الرقمية، أكد باللي هاد النوع ديال العمليات كيبين ضرورة وجود قوانين تحمي المستثمرين، واعتبر أن المنصات كتتحمل المسؤولية فهاد النوع ديال الهجمات، حيث بزاف منها ما كتعطيش أهمية كبيرة للحماية المعلوماتية، الشي اللي كيعرض ملايين الناس لخسائر ضخمة.

وزاد الباحث وقال باللي هاد السرقة الرقمية يمكن تكون جزء من حروب اقتصادية خفية، بحيث أن القراصنة اللي وراها ماشي بالضرورة يكونو مجرد هاكرز، ولكن يمكن يكونو مجموعات عندها أهداف اقتصادية وسياسية.

نصائح الباحث أحمد النميطة للمغاربة اللي باغيين يستثمرو فالكريبتو:

ما تخزنوش مبالغ كبيرة فالمحافظ الإلكترونية ديال المنصات، وخليو الفلوس فـ Cold Wallets اللي عندها حماية أقوى.

خدّو وقتكم فالبحث على سمعة المنصة قبل ما تحطو فيها فلوسكم، وتأكدو باللي كاينة عندها ضمانات قانونية فحالة وقع شي اختراق.

ما تغامروش بفلوسكم كاملة، وخدمو بعقلانية فهاد النوع ديال الاستثمار.

تجنبو المواقع المشبوهة والروابط اللي كيتبعتو فالإيميلات والرسائل، لأن بزاف ديال الاختراقات كاتوقع بطرق احتيالية بحال التصيد الإلكتروني (Phishing).

الدولة خاصها تدخل وتنظم هاد السوق، باش ما يبقاش المواطن المغربي عرضة للنصب والاحتيال فهاد المجال.

هاد النوع ديال السرقات الإلكترونية ماشي جديد، حيث فـ2022 تم اختراق شبكة Ronin وسرقو منها 620 مليون دولار، وفـ2023 Binance تعرضات حتى هي لسرقة 41 مليون دولار، الشي اللي كيزيد يطرح تساؤلات كبيرة على مدى مصداقية وأمان منصات التداول.

هاد النوع ديال الأحداث كيبين باللي الطريق مازال طويل باش العملات الرقمية تولي فعلا سوق آمنة للاستثمار. فالمغرب، السؤال اللي كيبقى مطروح هو: واش المغاربة غادي يبقاو كاينجرفو فهاد المجال بلا حساب؟ ولا غادي يعاودو النظر فالمخاطر اللي كاتواجههم؟

عن موقع: فاس نيوز